Prokuroria pranë Gjykatës së Shkallës së Parë në Kukës ka bërë kërkesë për shpalljen në kërkim ndërkombëtar për këngëtaren nga Kosova, Fjolla Morina, e dënuar me 25 mars nga Gjykata e Shkallës së Parë në Kukës me gjashtë vjet burgim për “trafik të armëve dhe municionit” – njofton Botapress.
Morina, e cila u largua në fillim të këtij viti nga banesa në Kukës ku qëndronte në arrest shtëpie, ka qenë në kërkim vetëm në Shqipëri.Kërkesa bashkë me materialin përkatës është nisur të martën në drejtim të Prokurorisë Përgjithshme dhe është firmosur nga prokurori Edmond Karriqi.
Prokuroria e Përgjithshme është ajo që vendos nëse kërkesa do të miratohet.
Nuk është e qartë nëse këngëtarja do të shpallet në kërkim ndërkombëtar pa mbaruar gjykimi i saj në Apel.Fjolla Morina u dënua në 25 mars nga Gjykata e Kukësit me nëntë vite burgim, që pas zbritjes së 1/3 prej gjykimit të shkurtuar u bënë gjashtë vjet. Gjykata më herët ndryshoi edhe klasifikimin e veprës penale nga armëmbajtje pa leje në trafikim të armëve që e rëndoi pozitën e këngëtares.
E pyetur mbi shpalljen në kërkim avokatja e këngëtares, Aurora Guska, ka thënë për BIRN se kërkesa e prokurorisë nuk mund të kundërshtohej dhe se ishte e drejtë e atij institucioni ta bënte.Ajo tha se kërkesa duhej të ishte sekrete. Por Guska pretendon se klientja e saj është e pafajshme për akuzën për të cilën është dënuar dhe kërkon në Apel që dënimi ndaj saj të zbutet./Botapress/
