Policia e Kosovës ka bërë të ditur se në 24-orët e fundit disa persona janë arrestuar pasi kanë ushtruar dhunë ndaj familjarëve të tyre, saktësisht, ndaj bashkëshorteve.
Policia ka bërë të ditur se është arrestuar dje në Prishtinë një person, që dyshohet se me datë 21 të këtij muaji e kishte sulmuar fizikisht bashkëshorten e tij.
“Prishtinë 21.08.2021 – 15:00. Më 25.08.2021 është arrestuar i dyshuari mashkull kosovar, pasi që i njëjti e kishte sulmuar fizikisht bashkëshorten e tij viktimën femër kosovare. Me vendim të prokurorit, i dyshuari pas intervistimit është dërguar në mbajtje”, thuhet në njoftim të policisë.
Në Prishtinë, është arrestuar edhe një person tjetër që ka sulmuar fizikisht bashkëshorten e saj.
“Prishtinë 24.08.2021 – 18:00. Më 25.08.2021 viktima femër kosovare, ka raportuar se pas një mosmarrëveshje është sulmuar fizikisht nga bashkëshorti i saj i dyshuari mashkull kosovar. Viktima është dërguar në strehimore, ndërsa i dyshuari është arrestuar dhe pas intervistimit me vendim të prokurorit është dërguar në mbajtje”, thuhet në raport.
Tutje, sipas policisë, në Podujevë, është arrestuar një person për dhunë në familje dhe i njëjti është dërguar në mbajtje.
“Fsh. Bervenik, Podujevë (NN) 21.08.2021 – 15:55. Në lidhje me rastin, është arrestuar i dyshuari mashkull kosovar dhe i njëjti pas intervistimit me vendim të prokurorit është dërguar në mbajtje”, shkruhet në raportin 24-orësh.
Policia ka bërë të ditur se në Gjilan një grua ka raportuar në polici burrin e saj duke thënë se i njëjti është duke ushtruar dhunë psiqike ndaj saj.
“Gjilan 25.08.2021 – 17:00. Viktima femër kosovare ka informuar se burri i saj i dyshuari mashkull kosovar ka ushtruar dhunë psiqike. Me vendim të prokurorit, rasti shkon në procedurë të rregullt”, thotë policia.
Policia ka liruar në procedurë të rregullt një person që ka ushtruar dhunë ndaj bashkëshortes.
“Prizren 25.08.2021 – 20:40. Është shoqëruar në stacionin policor i dyshuari mashkull kosovar, pasi që kishte ushtuar dhunë ndaj bashkëshortes së tij viktimës femër. Me sugjerim të prokurorit, i dyshuari është ndalur në ndalim policor dhe më pas të lirohet në procedurë të rregullt”, thotë policia./GazetaExpress/