Kryeministri Albin Kurti ka foluar para mediave pas takimit me presidentin Aleksandër Vuçiq në Bruksel. Njëri prej propozimeve të kryeministrit Kurti në këtë takim qe për largim të Oliver Odaloviq, nga pozita e kryesuesit për persona te pagjetur prej delegacionit serb.
Lidhur me këtë ka dhënë një vlerësim përfaqësuesi i familjeve kosovare të personave të pagjetur, Bajram Qerkini, i cili tha se nëse kryeministri Albin Kurti ka argumente se Oliver Odaloviq duhet larguar nga funksioni i tij, kjo duhet mirëpritur.
”Ne familjarët kemi thënë se edhe me dreqin e dreqit duhet biseduar për personat e pagjetur por edhe në qoftë Kasapi i Ballkanit, që ka qenë tmerr i Kosovës, edhe me të duhet të bëhet bisedë për personat e pagjetur për shkak se ata dinë dhe me ata duhet të ulesh të bisedohet”, tha ai për Klan Kosova.
”Nëse Oliver Odaloviq din për personat e pagjetur plotë 21 vjet dhe nuk ka marrë asnjë politikanë asgjë ndaj tij, atëherë ka ardhë koha t’i thotë dikush të largohet nga ky funksion se ti je ai që ke bërë”.
”Unë i kam thënë shpesh herë se ”ti i di të gjitha sepse ke qenë njësiti gjatë luftës për pastrimin e terrenit”, dhe duke qenë se ke pastru terrenet, e ke ditë edhe për trupat të cilët sot ne i kërkojmë”, shtoi ai.
Është zotuar dhe ka thënë se ”nuk kam hasur në trupa” dhe ”nuk mund të them për asnjë varr masiv se e di ku është pa pasur dëshmitar”. Ai është zotuar disa herë, mirëpo nëse argumentet janë nga Albin Kurti, atëherë është e mirëseardhur dhe duhet që të largohet e t’i thuhet atij ”ti zotni nuk e ke vendin këtu” ”.
”Çka kam për t’i propozu unë, kryeministrit tonë [Albin Kurti]?”.
”Nëse flasin për të pagjeturit, e lutim që duhet të jetë një familjar që del para të gjithë familjarëve dhe ua sqaron në mënyrë më të detajuar atë çka e flasim ne familjarët mes veti, por jo çka e flasin politikanët”, ka thënë Qerkini./Botapress/
