Oda e Hotelerisë dhe Turizmit ka njoftuar sot se në takimin e përfaqësuesit të tyre me ministrin e Shëndetësisë, Arben Vitia, është marrë vendim që vaksinimi me vaksinën anti-COVID të jetë i obligueshëm për ata që do të marrin pjesë në dasma, klube të natës e qendra tregtare
Në njoftimin e OHT-së bëhet e ditur se ky vendim është marrë pas rritjes së numrit të rasteve pozitive me COVID-19.
Nga OHT-ja kanë bërë të ditur se këto vendime pritet të hyjnë në fuqi nga data 11 gusht, stafit punues të këtyre sektoreve do t’u kërkohet dëshmia e vaksinës nga data 12 gusht, ndërkaq qytetarëve nga data 20 gusht.
“Çdo qytetar i Kosovës në mënyrë që të marrë pjesë në çdo aktivitet shoqërorë, qoftë qendër tregtare, klube të natës apo në ahengjet familjare obligohet që të marrë vaksinën anti-covid, sepse nga data 20 gusht do të kërkohet që të paktën dozën e parë ta kenë të përfunduar përndryshe nuk mund të marrin pjesë në asnjë aktivitet”, thuhet në njoftimin e OHT-së.
“Ndërsa sa i përket stafit punues të këtyre sektoreve obligohen që deri më datë 12 gusht të përfundojnë të paktën dozën e parë të vaksinimit”, thuhet në njoftim.
Po ashtu, është bërë e ditur se është diskutuar edhe zgjatja e orarit për klubet e natës.“Gjithashtu sa i përket orarit të klubeve të natës u bisedua që të ketë zgjatje pra këto aktivitete të fillojnë nga ora 23:00 deri në ora 03:00 pas mesnate”, bën të ditur njoftimi.
