Në aksionin e sotëm të Partisë Socialdemokrate (PSD), janë arrestuar Dardan Molliqaj dhe shtatë aktivistë të kësaj partie. Njëri ndër të arrestuarit është edhe babai i Frashër Krasniqit, shkruan Gazeta Botapress.
Lajmin për arrestimin e babait të Frashër Krasniqit, e ka bërë të ditur ish-aktivisti i PSD’së, Shkodran Hoti. Me anë të një shkrimi në Facebook, ai ka ilustruar arrestimin e dikurshëm të babait të Albulena Haxhiut dhe arrestimin e sotëm të babait të Frashër Krasniqit.
Momenti kur arrestohet babai i Frashër Krasniqit.
“Në foto lart është babai i Albulena Haxhiut. Në foto poshtë është babai i Frashër Krasniqit. Ky lart arrestohej dikur kështu nga policia e kapur nga Pronto, siç i thoshim. Ky poshtë po arrestohet sot nga policia, që sot mund ta quajmë e Xhelalit. Dikur Albulena e mbronte në shesh babain e saj nga këta policë, të cilët sot nga pushteti ku bën pjesë ajo po marrin urdhëra që të arrestohen Frashëri e babai i tij, dikur shokë të saj”, ka shkruar ai.
Ndërkaq Policia e Kosovës e ka konfirmuar arrestimin e kryetarit të Partisë Socialdemokrate (PSD), Dardan Molliqajt dhe shtatë aktivistëve tjerë të kësaj partie, të cilët shënuan disa grafite në veturat zyrtare që gjendeshin para objektit të ish-Rilindjes, në Prishtinë.
Lajmin për Metron e ka konfirmuar, zëdhënësi i Policisë për rajonin e Prishtinës, Agron Borovci.
Ai tha se aktivistët e PSD’së, kanë shfaqur shenja të agresivitetit, veprimeve të ulëta të kontaktit fizik me pjesëtarë të policisë, shpërfilljes së urdhrave të zyrtarëve policor si dhe pengim të tyre në kryerjen e detyrës zyrtare.
“Duke u gjendur në rrethana të tilla, policia ka shoqëruar në stacionin policor tetë prej tyre dhe aktualisht të njëjtit janë duke u proceduar në fazën preliminare. Së këndejmi është njoftuar edhe prokurori i shtetit i cili bashkërisht me policinë po koordinon veprimet vijuese që konsistojnë në zbardhjen e të gjitha rrethanave që karakterizojnë ngjarjen, përpara masave të mëtejme në procedure”, ka thënë Borovci për Metron.
Sipas njoftimit të PSD’së, të arrestuar përveç kryetarit Molliqaj, janë edhe anëtarët Teutë Rrusta, Nol Nushi, Zgjim Hyseni, Qëndrim Sahiti, Frashër Krasniqi, Ali Krasniqi dhe Korab Korça.