Kryetari i Këshillit të Mediave të Shkruara, Imer Mushkolaj, ka reaguar pas postimit të Prindon Sadriut, bashkëshortit të presidentes Vjosa Osmani, i cili njëherësh është edhe diplomat.
Përmes një reagimi në Facebook, Mushkolaj ka thënë se Sadriu nuk është vetëm bashkëshorti i presidentes Osmani, por është edhe diplomat i rangut të lartë, pra zyrtar shtetëror.
“Është edhe epror rezervë në FSK. Tash disa ditë ai përdor gjuhë linçuese kundër gazetarëve dhe mediave. Ministria e Jashtme dhe FSK urgjentisht duhet të marrin masa ndaj tij dhe të veprojnë sipas rregullativave ligjore në fuqi”, thuhet në postimin e Mushkolajt.
Ai ka thënë se Sadriu nuk mund të mbulojë të bëmat e bashkëshortes, duke akuzuar gazetarë e media me fjalor të ulët.
“Ai nuk mundet që, në përpjekje për t’i mbuluar bëmat e bashkëshortes, të akuzojë gazetarë e media me fjalor të ulët që mbase mund ta përdor ndonjë militant i frustruar, por kurrsesi një diplomat”, ka përfunduar Mushkolaj.
Kujtojmë se reagimi i Mushkolajt vjen pas postimit të Sadriut mbrëmjen e djeshme, i cili përdori gjuhë të ashpër ndaj mediave pas publikimit të shpenzimeve për udhëtim të presidentes Vjosa Osmani.
Ai kishte shkuar aq larg sa ka cilësuar mediat si “Ndërmarrje e përbashkët kriminale”.
Megjithatë, Sadriu tashmë ka fshirë postimin e djeshëm nga Facebook.
Statusi i plotë i Mushkolajt:
Prindon Sadriu nuk është vetëm bashkëshorti i presidentes Vjosa Osmani, por është edhe diplomat i rangut të lartë, zyrtar shtetëror. Është edhe epror rezervë në FSK. Tash disa ditë ai përdor gjuhë linçuese kundër gazetarëve dhe mediave. Ministria e Jashtme dhe FSK urgjentisht duhet të marrin masa ndaj tij dhe të veprojnë sipas rregullativave ligjore në fuqi. Ai nuk mundet që, në përpjekje për t’i mbuluar bëmat e bashkëshortes, të akuzojë gazetarë e media me fjalor të ulët që mbase mund ta përdor ndonjë militant i frustruar, por kurrsesi një diplomat.