Një veturë e cila ishte marrë me qira në një ‘Rent a Car’ në Ferizaj i ka bërë lëmsh disa persona. Ajo nuk u gjet në vendin që ishte parkuar nga një klient i cili e kishte marrë atë në shfrytëzim dhe si rrjedhojë nisën hetimet për të zbardhur rrethanat se ku u ‘zhduk’ ajo.
Gazeta mëson se një person i cili kishte marrë me qira një veturë në ‘Rent a Car’, ka parkuar veturën ditë më parë në parkingun e Aeroportit Ndërkombëtar të Prishtinës ‘Adem Jashari’, mirëpo të njëjtën nuk e ka gjetur aty kur është kthyer.
Kjo ka bërë që pronari i biznesit të denoncojë rastin në Polici, ku ka deklaruar se klienti që ka marrë në shfrytëzim veturën, e kishte parkuar atë në parking të aeroportit, teksa çelësat e saj i kishte lënë mbi gomë të automjetit.
Vetura e vjedhur u gjet pak ditë më vonë në Prishtinë dhe të njëjtën e kishte marrë gabimisht një mërgimtare nga Gjermania.
50-vjeçarja është shoqëruar në stacion policor kur është intervistuar nga hetuesit në cilësinë e dëshmitares, teksa vetura është sekuestruar për t’iu kthyer në pronësi pronarit të saj. /Botapress.info/