Një nga gazetat më të njohura boshnjake e ka cilësuar si të rënda dhe të pakënaqshme për Serbinë dhe presidentin e saj, Aleksandar Vuçiq, konstatimet e nxjerra nga darka e mbrëmshme me emisarin e BE-së, Miroslav Lajçak dhe kryeminstrin e Kosovës, Albin Kurti.
“Klix.ba”, një media nga Bosnjë dhe Hercegovina, vuri theksin tek gjuha e trupit që transmetoi fotografia e nxjerrë nga takimi trepalësh në Berlin të mërkurën.
Sipas raportimit të gazetës, “vetëm një biznesmen buzëqeshi” dhe ai ishte Kurti.
“Një ecuri e tillë e bisedimeve ndoshta i ka dhënë kënaqësinë më të madhe kryeministrit kosovar, gjë që shihet në foton e bashkangjitur nga darka në Berlin”, raporton “Klix.ba”, transmeton Paparaci.
Sipas gazetës online boshnjake, konkluzionet e nxjerra nga takimi në Berlin, në thelb, janë këto:
- Nuk ka ndryshim kufijsh apo shkëmbim territoresh mes Serbisë dhe Kosovës
- Marrëveshja përfundimtare duhet të përfshijë njohjen reciproke mes Serbisë dhe Kosovës
- Nuk duhet të ketë nxitje të luftës
- Gjermania do të mbështesë liberalizimin e vizave për qytetarët e Kosovës
- Mund të pritet më shumë presion i BE-së ndaj Serbisë
Siç raporton gazeta nga rajoni, kohët e fundit, ata pak njerëz që e kanë ndjekur politikën rajonale kanë mundur t’i vënë re shqetësimet e vazhdueshme të Vuçiqit për presionin në rritje nga Perëndimi, i cili pret që Serbia të vendos përfundimisht për orientimin e saj kah Perëndimi apo Rusia.
“Presioni ndaj Serbisë është vërtet i madh”, raporton “Klix”.
“Klix.ba” është një nga gazetat online më të lexuara në Bosnjë dhe Hercegovinë. Ajo është themeluar në vitin 2000.
