Revista gjermane “Fokus” e shpalli Trebinjen në Bosnjë & Hercegovinë si vendin më të mirë në botë për të jetuar pas daljes në pension.
“Focus” ka bërë renditjen duke krahasuar 575 qytete në botë dhe si kriter ndër të tjera ka marrë situatën e sigurisë dhe cilësinë e kujdesit shëndetësor sipas të huajve që jetojnë atje.
Përzgjedhja për vendin më të mirë për të jetuar pas daljes në pension mori parasysh edhe qiranë mesatare dhe kostot e jetesës në krahasim me Berlinin, klimën e mirë, cilësinë e ajrit dhe sa shpejt dhe pa stres mund të kaloni nëpër qytet me veturë ose transport publik.
Sipas “Focus”, Trebinje ka fituar 81.9 pikë nga 100 gjithsej, çka e ka hequr këtë vit nga maja fituesin e vitit të kaluar, qytetin gjeorgjian Batumi.
Pikët më të larta lidheshin me qiratë, kostot e jetesës dhe kujdesin shëndetësor, dhe çdo vend shfaqet në listë vetëm një herë me qytetin e tij më të mirë.
Trebinja këtë vit është përmirësuar me 1.1 pikë.
Revista gjermane shkruan se Trebinja ndodhet në pjesën më jugore të Bosnjës dhe afër detit dhe se është vendi më i vogël në këtë listë.
“Fokus” thekson se qyteti është historikisht interesant me një katedrale katolike, një manastir ortodoks serb dhe një xhami.
Ndër dhjetë vendet më të mira për “epokën e artë”, pas Trebinjes, janë Antalia në Turqi, Mangalore në Indi, Qingdao në Kinë, Cuenca në Ekuador, Sorocaba në Brazil, Coimbra në Portugali, Veliko Tarnovo në Bullgari, Timisoara në Rumani dhe Osijek, Kroaci.
