Kryetari i Prishtinës, Shpend Ahmeti me anë të një postimi ka kërkuar nga qytetarët që të mos e frekuentojnë parkun nacional të Gërmisë pasi që është parë një ari.
Tutje, Ahmeti bën me dije se ariu nuk është pjesë e “Parkut të Arinjve” dhe se besohet të ketë ardhur përmes shtigjeve malore që lidhen me pjesën e Gollakut, transmeton Indeksonline.
Postimi i plotë i Shpend Ahmetit:
Apel për qytetarët!
Të nderuar qytetarë, ju bëjmë thirrje që t’i shmangeni frekuentimit të Parkut të Gërmisë, pasi para pak minutash kemi pranuar një informacion nga Policia e Kosovës se është vërejtur një Ari.
Ariu nuk është pjesë e “Parkut të Arinjëve”, prandaj ekziston mundësia që i njëjti të ketë ardhur përmes shtigjeve malore që lidhen me pjesën e Gollakut.
Rojat e pyllit janë duke u munduar të lokalizojnë Ariun por deri në një njoftim tjetër apelojmë të shmangni lëvizjet në Parkun e Gërmisë!