Gjatë fushatave elektorale politikanët premtojnë shumë, ndërsa jo gjithmonë i realizojnë edhe premtimet e tyre. Instituti GAP ka prezantuar se sa janë përmbushur premtimet e kryetarëve të komunave të Kosovës. Në këtë hulumtim të tyre del se kryetarët e Lëvizjes Vetëvendosje kanë premtuar 333 herë, transmeton Gazeta Botapress.info
Kryetari i komunës së Gjilanit, Alban Hyseni arriti të mposht në garë zgjedhore Lutfi Hazirin e LDK’së. Për të bindur elektoratin se është më i mirë se ky i fundit i premtoi qytetarëve 109 premtime.
Pas afro një viti nga marrja e pushtetit në Gjilan, ai i ka përfunduar tetë prej tyre. Ndërkaq, sipas GAP shtatë janë gjysmë të përmbushura, 17 kanë filluar dhe 77 nuk kanë filluar.
I pari i komunës së Kamenicës, Kadri Rahimaj përkundër bashkë partiakut të tij nuk është se ka premtuar shumë. Por, edhe shumë premtime nuk i ka filluar.
Janë gjithsej 56 premtime të bëra nga Rahimaj, ku nëntë prej tyre kanë përfunduar, dy janë gjysmë të përmbushura, dhjetë kanë filluar dhe 35 të tjera po presin.
Garën e ‘nxehtë’ të Podujevës e fitoi për një ‘fije floku’ Shpejtim Bulliqi ku në balotazh kishte pasur kandidat, Ekrem Hysenin e LDK’së. Ky i fundit në raundin e parë zgjedhor kishte dalë i pari.
Bulliqi në qytetin e Podujevës e në fshatrat përreth premtoi 61 herë. Mirëpo, 30 nga premtimet e tij ende nuk kanë filluar. Tetë janë të përfunduara, pesë gjysmë të përmbushura dhe 18 kanë filluar.
Qemajl Aliu i Shtimes premtoi shumë gjatë fushatës zgjedhore, por punët siç duket nuk po i ecin shumë mirë. Plotë 107 premtime nga Aliu, por pas afro një viti që nga marrja e pushtetit i ka përmbushur plotësisht vetëm shtatë.
Tre nga ato janë gjysmë të përmbushura, 30 kanë filluar dhe 67 të tjera nuk kanë filluar.Pra, në total nga katër kryetarët e komunave të udhëhequra nga VV janë përmbushur deri më tani 32 premtime, 17 janë gjysmë të përmbushura, 75 kanë filluar dhe 209 nuk kanë filluar.
Këtu mund të gjeni raportin e plotë të institutit GAP për të gjitha komunat e Kosovës. /Botapress.info/
