Fabrika e ujit në Zubin-Potok është vënë nën menaxhimin e Kompanisë Rajonale të Ujësjellësit “Mitrovica”, pas ndërprerjes së veprimtarisë ilegale të strukturave paralele që operonin atje.

Lajmi është bërë i ditur nga ministrja në detyrë e Ekonomisë, Artane Rizvanolli, përmes një postimi në Facebook, ku konfirmoi ndërhyrjen institucionale të koordinuar me Policinë e Kosovës dhe njësitë përkatëse.

“Sot është ndërprerë veprimtaria ilegale e strukturave paralele në Fabrikën e ujit në Zubin Potok, me kërkesë të Njësisë për Monitorimin e Ndërmarrjeve Publike të Ministrisë së Ekonomisë”, ka shkruar Rizvanolli.

Ajo e cilësoi këtë fabrikë si një aset kyç për sigurinë e furnizimit me ujë për mijëra qytetarë në veri të vendit.

“Kjo fabrikë e ujit është aset kritik për furnizim të sigurt me ujë për mijëra qytetarë të Republikës së Kosovës në komunat veriore. Andaj, marrja nën kontroll e këtij aseti është çështje e sigurisë, e shëndetit publik dhe e shtrirjes së kontrollit institucional”.

Sipas Rizvanollit, tashmë KRU Mitrovica do të ketë për detyrë të sigurojë funksionimin e sistemit sipas standardeve shtetërore.

“Tash e tutje, KRU Mitrovica do të sigurohet që ky sistem jetik të funksionojë sipas standardeve ligjore dhe teknike të Republikës së Kosovës”.