Kryetari i Partisë Demokratike të Kosovës, Memli Krasniqi, ka uruar 22 vjetorin e themelimit të kësaj partie. Por njëkohësisht është shprehur i lënduar pasi ky është përvjetori i parë i cili festohet pa praninë e ish-liderëve të saj, Hashim Thaçit dhe Kadri Veselit.
“Në shënimin e këtij përvjetori, Partia Demokratike e Kosovës është e lënduar, pasi që themeluesit dhe drejtuesit e saj, Hashim Thaçi dhe Kadri Veseli, për herë të parë nuk janë në mesin tonë për ta shënuar këtë datë. Ata po ballafaqohen me betejën e fundit për dinjitetin e Ushtrisë Çlirimtare të Kosovës dhe luftës së pastër për çlirim, nga e cila betejë, jemi të bindur se do të dalin fitimtarë, për t’u kthyer në mesin tonë ashtu siç edhe janë – si heronj”, ka shkruar Krasniqi në Facebook.
Sipas tij ndonëse të lënduar, janë unikë e më të vendosur se kurrë, që misionin dhe vizionin e tyre për shtetin dhe shoqërinë e Kosovës ta shpijnë aty ku duhet.
“Krenare për rrugëtimin e saj, për trashëgiminë e saj politike, si bartëse e kauzës së luftës për çlirim, për angazhimin për pavarësi dhe shtet-ndërtim, Partia Demokratike e Kosovës sot shënon 22 vjet të themelimit të saj. Urime të gjithëve!”, ka shkruar tutje ai.
Krasniqi ka thënë se udhëheqësit e PDK-së, së bashku me qytetarët e Kosovës, për vite me radhë dhanë kontribut të jashtëzakonshëm, për ta shtruar rrugën e pavarësisë, duke arritur që ta përmbyllin me sukses themelimin e shtetit në vitin 2008.
Sipas Krasniqit kultivimi i lirisë politike e qytetare dhe i shtetit sovran e demokratik ishin themele të kauzës së partisë së tyre që në fillet e misionit të saj politik, teksa patriotë, luftëtarë të lirisë, intelektualë, e qytetarë nga të gjitha anët e Kosovës themeluanPartinë Demokratike të Kosovësdhe ecën së bashku në këtë projekt kombëtar.
