[responsive-menu menu="logged-in-menu"]

Kosova i zotohet Brukselit se do të përmbahet nga veprimet e njëanshme



Botapress, 30 janar – Pala kosovare është zotuar para ndërmjetësueses në dialogun e Brukselit, Federica Mogherini, se nuk do të ndërmarrë veprime të njëanshme të cilat mund të çojnë në tensione.

Por vetëm një muaj më parë krerët shtetërorë ishin zotuar edhe para Kuvendit të Kosovës se pavarësisht pasojave do të rrënohet muri i ndërtuar ilegalisht në Mitrovicë, më së largu deri më 31 janar, shkruan sot Koha Ditore.

Sipas asaj që kanë thënë zyrtarët qeveritarë, në takimin e 1 shkurtit problemi i murit nuk do të jetë temë diskutimi. Marrëveshja për energjinë, drejtësinë dhe Asociacionin – janë temat që, sipas Qeverisë, do të diskutohen në Bruksel.

Muri i ndërtuar ilegalisht në Mitrovicë nuk do të rrënohet sipas Rezolutës së Kuvendit, e cila obligon Qeverinë që kjo të ndodhë më së largu të martën.

Autoritetet do të rezervohen nga ndërmarrja e veprimeve që do të rikthenin tensionet për shkak se më 1 shkurt do të mbahet takimi i radhës në Bruksel, në mes të kryeministrit Isa Mustafa dhe Aleksandar Vuçiqit.