Rreth 9 mijë zyrtarë policorë ka gjithsej vendi, por shumë prej tyre çdo ditë ballafaqohen me kushte aspak adekuate për ta. Por ajo çfarë është edhe më interesante ka të bëjë me gjendjen e veturave që drejtohen nga këta zyrtarë policorë.
Në një fotografi të dërguar në lajmi.net shihet gjendja e rënduar e një veturë zyrtare të policisë, saktësisht të njërës prej ulëseve që ka kjo veturë. Vërejtje të shumta pati së fundi për kushtet në të cilat funksionojnë këta zyrtarë policorë, sa i përket kualitetit të uniformave, shujtave ushqimore e shumë gjëra të tjera.
Përpos Njësive të Specializuara , njësitë e tjera janë të paktë që posedojnë edhe antiplum që është një prej mjeteve kyçe që i siguron ata në çfarëdo përballje me rrezikun.
Kurse sa i përket shujtave ushqimore, zyrtarët policorë jashtë Njësive Speciale nuk posedojnë asnjë shujtë.
Ngjashëm janë kushtet edhe me sigurimin mjekësorë, çështje kjo për të cilën premtohet tash e sa vite, por asnjëherë nuk u realizua.
Duhet përkujtuar që përpos njësive policore të cilat janë duke funksionuar nga 12 orë çdo ditë e natë, policë të shumtë prej katër ditësh janë vendosur në veri të vendit, për të siguruar rendin dhe qetësinë aty ku serbët po vazhdojnë të bllokojnë rrugët si shenjë proteste për reciprocitetin e vendosur nga Qeveria e Kosovës ndaj Serbisë, në lidhje me targat e automjeteve.
Deri në përmirësimin e kushteve të zyrtarëve policorë, qytetarëve u mbetet vetëm të krenohen me punën që po bëjnë ata./Botapress.info/