Ish-presidenti amerikan, Donald Trump është akuzuar për shtatë akuza, duke përfshirë shkeljen e ligjit të spiunazhit dhe komplotin për të penguar hetimin penal, në një vendim të prokurorit special, Jack Smith.
Ai ishte edhe kryeprokuror i Speciales, kur në qershor të vitit 2020 u ngrit aktakuza për krime lufte ndaj Hashim Thaçit.
Smith një prokuror veteran dhe zyrtar i departamentit të drejtësisë, ka qenë në qendër të dy hetimeve federale për sjelljen e pahijshme të Trump – një në lidhje me ndërhyrjen e Trump në certifikimin e zgjedhjeve të vitit 2020 dhe tjetri për keqpërdorimin e dokumenteve të klasifikuara të gjetura në Florida nga shtëpia ish-presidentit “Mar-a-Lago”.
Gjatë një hetimi shtatë mujor, Smith dhe ekipi i tij intervistuan ish-zyrtarët e Shtëpisë së Bardhë, ndihmësit e Trump dhe stafin e Mar-a-Lago në hetimin e dokumenteve të klasifikuara përpara se të jepnin vendimin të enjten.
Një i pavarur i regjistruar, Smith u emërua nga Prokurori i Përgjithshëm i ShBA-së, Merrick Garland, në nëntor 2022 për të shërbyer si prokuror special që mbikëqyr dy hetimet. Departamenti i Drejtësisë nuk ka marrë ende një vendim në lidhje me rolin e Trump në komplotin për të përmbysur zgjedhjet e vitit 2020.
Pasi u emërua, Smith, në atë kohë kryeprokuror në gjykatën penale ndërkombëtare, punoi fillimisht nga Holanda ndërsa u shërua nga një aksident me biçikletë. Smith dha dorëheqjen nga ai rol, ku hetoi krimet e luftës në Kosovë, për të marrë postin e prokurorit special në ShBA, raporton The Guardian.
Karriera e një prokurori
Smith, karriera e të cilit si prokuror zgjati tre dekada, kaloi më shumë se një dekadë në Nju Jork, ku punoi si ndihmës avokat amerikan nga viti 1999 deri në 2008 pas një periudhe pune si prokuror në zyrën e prokurorit të qarkut të Manhatanit. Kreu aktual i saj, Alvin Bragg, ngriti në prill një padi me 34 pika kundër Trump për falsifikimin e të dhënave të biznesit për të fshehur pagesat e heshtura ndaj aktores së filmave për të rritur Stormy Daniels gjatë ciklit zgjedhor të 2016-ës.
Ai ishte një ndihmës avokat amerikan në Tenesi – dhe shërbeu për një kohë të shkurtër si ushtrues detyre i avokatit amerikan. Nga viti 2010 deri në vitin 2015, Smith mbikëqyri seksionin e integritetit publik të departamentit të drejtësisë, i cili u krijua pas skandalit të Watergate për të mbikëqyrur korrupsionin dhe për të ndjekur penalisht krimet nga zyrtarët qeveritarë.
Deri me 100 vjet burg mund të dënohet ish-presidenti Trump! Ja pse akuzohet?
Smith u emërua kryeprokuror i Gjykatës Ndërkombëtare Penale (ICC) në vitin 2018.
Njoftimi i Garland se ai do të emëronte Jack Smith si prokuror special që do të mbikëqyrte dy hetimet penale federale erdhi disa ditë pasi Trump njoftoi se do të kandidonte përsëri për president.
Investigimi i Smith-it zbuloi se Trump pranoi se mbajti dokumente klasifikuar
Në fillim të kësaj jave, Smith u pa duke u takuar me avokatët e departamentit të drejtësisë dhe anëtarët e ekipit mbrojtës të Trump, në shenjë se ai së shpejti do të jepte një vendim. Ekipi i Smith më pas informoi avokatët e Trump në një letër se ish-presidenti ishte një objektiv i hetimit të dokumenteve, sipas raporteve të shumta.
Mark Meadows, ish-shefi i stafit të Trump, dëshmoi para një jurie të madhe në Florida të mërkurën, në një tjetër shenjë se hetimi po i afrohej fundit.
Trump, megjithatë, kishte pohuar se nuk ishte në dijeni të aktakuzës.
“Askush nuk më ka thënë se jam duke u paditur dhe nuk duhet të jem sepse nuk kam bërë asgjë të gabuar”, ka thënë Trump në një postim të Truth Social.
Por hetimi i Smith dëshmon të kundërtën: mes provave është një kasetë audio ku Trump thotë se mbante një dokument të klasifikuar që përshkruante një sulm të mundshëm ndaj Iranit, raportoi fillimisht CNN .
Trump është aktualisht pretendenti kryesor për nominimin republikan në 2024.
