Deputeti i Lëvizjes Vetëvendosje, Hydajet Hyseni zgjodhi t’i bënte homazh Deklaratës Kushtetuese të 2 korrikut 1990, në një fjalim në Kuvendin e Kosovës të enjten, më 30 qershor.
Fjalimi i Hysenit, një ish të burgosuri politik, zgjati rreth pesë minuta dhe detyroi kryetarin e Kuvendit të Kosovës, Glauk Konjufca, që t’ia zgjaste atij fjalimin i cili iu ndërpre dy herë.
“E mora sot fjalën për të risjellë në vëmendjen tonë të përbashkët një ditë kthese prej historisë tonë të re; ditën e dy korrikut, ditën e deklaratës kushtetuese në të cilën shpallet qëndrimi burimor i Kushtetetës së Kosovës dhe i Kuvendit si akt i vetëvendosjes politike në kuadër të federatës shumëkombëshe”, tha Hyseni.
“Tridhjetë e një vjet më parë, 131 delegatë të kuvendit të atëhershëm krahinor, ndonëse nën trysni brutate dhe kërcënime të egra e të jashtëzakonshme, bashkuan zemrat, mendjet dhe idealet dhe me një hov të rëndësishëm i thanë jo pabarazisë”, vijoi ai.
Në homazhin e tij për ngjarjen e 2 Korrikut, Hyseni përmendi edhe Lidhjen e Prizrenit e Konferencën e Bujanit, por për të gjitha këto nuk mund t’ia zgjaste më shumë fjalën kryeparlamentari, bazuar në rregulloren e kuvendit.
“Lirisht dorëzojeni me shkrim, falemnderit shumë. Mund ta dorëzoni edhe me shkrim fjalën. Ishte pra një homazh për ngjarjen e 2 korrikut. Pa dyshim një ngjarje shumë e rëndësishme e historisë tonë”, tha Konjufca. Deklarata Kushtetuese e 2 Korrikut 1990, e miratuar nga delegatët e Kuvendit të atëhershëm të Kosovës, shpalli pavarësinë e Kosovës nga Serbia.
