Zëvendësministrja e Jashtme e Ukrainës Emine Dzhaparova akuzoi të enjten Federatën Ruse për përfshirje në akte që përbëjnë krime lufte, duke shtuar se forcat ruse në Ukrainë kanë kryer “shkelje të hapur” të të drejtave të njeriut.
“Ngjarjet e fundit tregojnë qartë faktin se trupat ruse që luftojnë në Ukrainë kryejnë shkeljet dhe abuzimet më flagrante të të drejtave të njeriut, duke u përfshirë në mënyrë sistematike në akte që qartazi përbëjnë krime lufte dhe krime kundër njerëzimit,” tha Dzhaparova, shkruan CNN.
“Bombat ruse po shkatërrojnë qytetet dhe fshatrat e atdheut tim, duke synuar zonat e banuara, shkollat, jetimoret, spitalet, kishat, muzetë, kullat televizive, sheshet qendrore dhe infrastrukturën kritike”, shtoi ajo.
Duke iu drejtuar Këshillit të Kombeve të Bashkuara për të Drejtat e Njeriut përmes video-lidhjes, Dzhaparova i bëri thirrje OKB-së që të kërkojë llogari nga Federata Ruse për pushtimin e saj në Ukrainë dhe agresionin e vazhdueshëm ushtarak.
“Ne besojmë se Këshilli i të Drejtave të Njeriut ka një rol udhëheqës për të luajtur në bashkimin e përpjekjeve për të garantuar përgjegjësinë e Rusisë për krimet e saj kundër vendit tim”, tha zëvendësministri i Jashtëm para këshillit.
“Ky është pikërisht momenti i së vërtetës, jo vetëm për vendin tim që po lufton për mbijetesën e tij, por për të gjithë sistemin ndërkombëtar të të drejtave të njeriut dhe institucionet e tij themelore, dhe për ata që iu besua promovimi i të drejtave të njeriut si anëtarë të këtij këshilli. ” ajo tha.
Rusia në mënyrë rutinore mohon të ketë shënjestruar civilët në Ukrainë; megjithatë, mediat ndërkombëtare dhe vëzhguesit kanë dokumentuar gjerësisht viktima civile dhe dëmtime në infrastrukturën civile.
Sipas Komisioneres së Lartë të OKB-së për të Drejtat e Njeriut, Michelle Bachelet, OKB-ja konfirmoi të paktën 752 viktima civile, përfshirë 227 të vrarë, të martën mbrëma. Megjithatë, llogaritë e numrit të viktimave të civilëve kanë ndryshuar shumë ndërmjet autoriteteve dhe agjencive të ndryshme.
Duke folur të enjten, Dzhaparova tha se Rusia e mban veten “mbi ligjin ndërkombëtar dhe mbi rendin e bazuar në rregulla”, por vuri në dukje se Ukraina “po i reziston” agresionit ushtarak rus.
“Bashkëpunimi ynë ndërkombëtar po forcohet çdo ditë”, shtoi ajo.
“Në këtë moment të jashtëzakonshëm, ne duhet të qëndrojmë së bashku për të siguruar llogaridhënie”, tha ajo.
