Qytetarët e Kosovës tash e një vit po përballen me rritje enorme të çmimeve. Në verën e vitit 2022, inflacioni i përgjithshëm arriti në 14.2 për qind, ndërsa për produktet esenciale kaloi 20 përqindshin. Kryeministri i Kosovës, Albin Kurti, ka akuzuar LDK-në se po e pengon Qeverinë të parandalojë inflacionin e lartë duke dërguar në Gjykatën Kushtetuese Projektligjin për çmimet tavan.
Gjate intervistës së mbrëmshme në “Rubikon” në Klan Kosova, kreu i ekzekutivit kosovar, duke diskutuar për krizën e çmimeve të larta, fajësoi Lidhjen Demokratike për shtrejntimin e çmimeve pasi sipas tij, nëse kjo parti nuk e dërgonte këtë Projektligj në Kuvendin Kushtetues, do të parandalohej rritja e çmimeve. Kryeministri e ka kaluar një pjesë të emisionit duke u ankuar se përse opozita ka dorëzuar në Gjykatën Kushtetuese këtë Projektligj, i cili sipas tij synon eliminimin e rritjes së çmimeve.
Lidhur me akuzat e kryeminisrit Kurti, deputeti i LDK-së Avdullah Hoti, në një përgjigje për Gazetën Nacionale ka thënë se ky Projektligj nuk është në pajtushmeri me parimet e ekonomisë së tregut të lirë dhe se nuk ka për qëllim mbrojtjen e konsumatorit.
LEXO EDHE:
https://botapress.info/shtrenjtimi-i-energjise-ldk-paaftesi-qeverisese-varferon-qytetaret/
“Ky Projektligj nuk është në pajtim me parimet e ekonomisë së tregut të lirë si dhe është në kundërshtim me përcaktimet kushtetuese të Kosovës. Kjo lloj politike mund të ketë për qëllim mbrojtjen e konsumatorit, por në botën e tregut të lirë ajo mund të ndikojë në efikasitetin e ekonomisë duke krijuar pëngesa të mëdha per prodhuesit.” .
Deputetët e Kuvendit të Kosovës kanë votuar në lexim të parë me 63 vota për, asnjë kundër dhe asnjë abstenim, Projektligjin për masat e përkohshme të produkteve bazike me 27 tetor të vitit 2022. Pas kësaj, deputetët e Grupit Parlamentar të Lidhjes Demokratike të Kosovës (LDK), Driton Selmanaj dhe Besian Mustafa, kanë dorëzuar në Gjykatë Kushtetuese Ligjin për masat e përkohshme të produkteve themelore në raste të veçanta të destabilizimit në treg.
Selmanaj kishte argumentuar se Projektligji për çmimet tavan është antikushtetues dhe se kjo nismë përbën ndërhyrje në vlerat e tregut të lirë. Edhe PDK dhe AAK ishin deklaruar kundër këtij Projektligji.
“Vlerësimi ynë, është se ky projektligj është antikushtetues. Kjo iniciativë paraqet një ndërhyrje arbitrare në vlerat e tregut të lirë. Ne i kemi adresuar dhe konkretizuar tri nene të Kushtetusë, është neni 7 ku flet për vlerat, neni 10 i cili flet për organizimin e lirë të tregtisë.” – ka thënë Selmanaj.
Ndonesë Kosova tash e disa muaj është karakterizuar me rritje enorme të çmimeve dhe ngadalësim të rritjes ekonomike, kryeministri Kurti po vazhdon të deklarojë se vendi ka shënuar rritje ekonomike dhe përmirësime, pavarësisht inflacionit të madh.
Kujtojmë se partitë opozitare kanë dhënë disa propozime në Kuvend për të iu dalë në ndihmë qytetarëve, por qeveria e Kosovës nuk i ka marrë parasysh ato.
