Analistët tashmë kanë filluar të redaklizojnë gjuhën. E gjitha filloi si pasojë e një deklarimi të kryeminsitrit Albin Kurti, dje në Kuvend, e ku shpalosi gjashtë kushtet e tij për të pranuar Asociacionin e komunave me shumicë serbe. Gjashtë kushtet e Kurtit kanë ngjallë reagimet e analistëve, disa prej të cilëve e përkrahën, ndërsa të tjërë e kundërshtuan. Megjithatë, nga gjithë kjo gjallëri mendimesh, u vërejten dy analistë.
Por jo aq për shkak të mendimit e qëndrimeve, sa për gjuhën e ashpër të përdorur për të komentuar kryengjarjen e ditës së djeshme. Analistët e afërt me pushtetin kritikuan ashpër opozitën e mediet, e kundërshtarët e Kurtit e “gozhduan” atë, gjersa të dy palët në disa raste tejkaluan kufirin e gjuhës politikisht korrekte.
Kush janë njerëzit që u bënë mur mbrojtës për Vuçiqin gjatë stuhisë në parlament?
“Skizofren”, “zvarranik”, “brengosje për gjendjen emocionale”, “qenë endacakë”, “kastravecë” e të ngjashme u përdorën nga analistët për të përshkruar situatën e djeshme, pasi Kurti plasi “bombën” në Kuvend.
Skandalizimi i gjuhës
Në fakt, i pari që filloi me gjuhë të ashpër ishte Nezir Kraki, analist kosovar me vendbanim në Francë. Në një status të botuar menjëherë pas debatit në Kuvendin e Kosovës rreth Asociacionit, Kraki “krakizoi” me gjuhë. Ai lëshoi një mori etiketimesh kundrejt opozitës, e që janë të papranueshme për një analizë korrekte mbi ngjarjet.
“O debila amnezikë, pse nuk e keni kundershtu Asociacionin kur lideret e juj e neshkruan, bile ate ne versionin e republikes serbe brenda Kosoves?
Po ta kishit pase nje miligram integritet personal apo moral publik, ju sot e kishit mshele gojen e ishit zhduk skutave te turpit. Jo! Ne vend te kesaj ju i turreni si qenë endacakë Albin Kurtit i cili veç po tenton me i korrigju tradhetite e krimet e shefave dhe partive qe ju perfaqesoni. Dhe kete e beni me zell aq proserb saqe edhe vet serbet habiten.” – shkroi ai.
Edhe një analist tjetër nga diaspora përdori një gjuhë jo aq politikisht korrekte. Bleron Baraliu shkroi një status në të cilin përdori terme të cilat në një diskutim normal nuk do të duhej të përdoreshin. Natyrisht, edhe ky në cak kishte opozitën.
“Hipokrizia e ojëqëistëve dhe ish-pushtetarëve është mendjetronditëse: në një anë çirren e luten për ‘zajednicën’, në tjetrën kush ma i pari e kush ma kllosharski kishe pe sulmojnë Albinin se e pranoi atë! O kastravecë e patlixhanë politikë, edhe ju të tjerë me dy kokrra në tru që nga mëria dhe parapozicionimi veç terr projeksiononi, çka nuk po ju pëlqen nga 6 pikat – dhe, sidomos, çka nuk po ju pëlqen nga taktika e Albinit, ani pse prej Hanës po shihet si një vollej tenisi?! Përqëndrohuni, mos u çthurni kështu. Kosova është e rëndësishme, jo Albini, Hashimi, Brahimi – këta janë veç vdekatarë të përkohshëm. Leni pallavrat, leni hutitë e matrapazllëqet, përqëndrohuni!” – shkroi ai, duke shkruar mëpastaj edhe një status tjetër ku kritikoi Abdixhikun.
Ndërsa Sadri Ramabaja, analist dhe aktivist i VV-së, e quajti opozitën zvarranike.
“Akti strategjik i përmbledhur në gjashtë pikat që Albini sot i parashtroi si kushte, jo vetëm për Beogradin, bëri që “partnerët alternativë” t’i heqin maskat.Prandaj ata, kundërvënien e kanë irracionale, kundërthënëse dhe rrjedhimisht të pabesueshme. Nuk mund të jesh tërë kohën zvarranik dhe për një çast të shndërrohesh në Lis që u delë përballë furtunave. Prandaj “partnerët alternativ” që rrinin gaditu për t’u rikthyer në pushtet dhe për ta realizuar BSK-në konform kërkesave të Beogradit, sot bëhen qesharak me akuzat e lansuara.” – shkroi z. Ramabaja.
E problemet emocionale e mendore të opozitës i përmendën edhe dy analistë pro pushtetit. Rron Gjinovci dhe Shkëlzen Gashi, dy analistë pro qeveritar, vlerësuan se opozita kanë probleme mendore, pasi po e keqinterpretojnë deklaratën e Kurtit, ku shpalosi gjashtë kushtet e famshme për themelimin e Asociacionit.
“Pata nje bisede me mikun tim Shkëlzen Gashin me ç’rast ia shprehem njeri-tjetrit brengat per gjendjen emocionale dhe mendore te opozites dhe njerezve te regjimit te vjeter.” – shkroi ai.
Por edhe analistët kundër Kurtit, nuk ngurruan të lëshohen në gjuhë. Së paku njëri nga ta, ishte absolutisht i papërmbajtur në gjuhë. Dardan Gashi, analist në RTV Dukagjini, “konkludoi” se Kurti është skizofren.
“Në të njëjtën seancë, njëherë thotë e pranoj (Asociacionin) me do kushte, tani thotë nuk e pranoj. Kjo e ka edhe një term mjekësor, me Sh ja nisë, skizofreni i thonë, kur një njeri i ka dy personalitete. Unë nuk e kam shpik skizofreninë, veç konstatim.” – tha Gashi, teksa pyetej nga moderatori në Debat Plus se a është Kurti skizofren.
