Deputeti i Aleancës për Ardhmërinë e Kosovës, Bekë Berisha dhe deputeti i Lëvizjes Vetëvendosje, Salih Zyba është përplasur sot në Komisionin për Siguri dhe Mbrojtje, ku po raportohet për Agjencinë për Menaxhimin e Emergjencave.
Zyba insistonte që të bënte pyetje shtesë për drejtorin e AME-së, Fadil Kodra, teksa Berisha i tha që temat për të cilat po pyeste ai janë të konsumuara.
“Të konsumuara janë këto tema”, tha Berisha.
“Edhe nëse janë të konsumuara 1 mijë herë, të lutna personalisht për anëtarët në të kaluarën është tjetër sen. Kur shtrohet pyetja qoftë edhe personale..”, tha Zyba.
“Po, tu përgjigj”, i tha Berisha.
“Jo nuk mu përgjigj. Ai nuk u përgjigj, sepse më tregoi se Prishtina e thirr Besianën”, iu kundërpërgjigj Zyba.
Këtu Berisha që është edhe kryetar i Komisionit, tha se Zyba nuk është as anëtar i rregullt i këtij Komisioni dhe se ai ka marrë hapësirë më të madhe se anëtarët për të bërë pyetje.
“E di që është e rëndësishme por ti nuk je anëtar i rregullt këtu. Ne i kemi bërë tërë pyetjet, i kemi konsultu dhe i kemi konsumuar goxha mirë dhe ti fole më shumë se ne dhe ne patëm mirëkuptim. Përgjigju në këtë pyetje sa më shkurt që është e mundshme se duhet me lëviz”, tha kryetari i Komisionit, Berisha. /Express/
