Analisti Baton Haxhiu tha në një intervistë për Euronews Albania se Albin Kurti nuk do të vijë personalisht në samitin e së martës në Tiranë për të shmangur një përplasje publike me Aleksandër Vuçiç.
“Nëse do duhej të kishte takim me Vuçiçin ku do të nënshkruhej një para-marrëveshje, nuk duhet të kishte ikur nga përgjegjësia.
Unë mendoj që Kurti ka ikur nga përgjegjësia e vetë, nuk ka dashur të krijojë përplasje publike me Vuçiç. Punët e vrazhda që nuk kanë peshë ia lënë Vjosa Osmanit”, u shpreh ai.
Kosova do të përfaqësohet në samit nga presidentja Vjosa Osmani.
Presidenti i Serbisë, Aleksandër Vuçiç ka vendosur që të marrë pjesë në samitin e BE-së dhe Ballkanit Perëndimor që do të zhvillohet në Tiranë dhe është nisur drejt kryeqytetit shqiptar.
Vuçiç pret që të ketë ndonjë përfitim nga qëndrimi i tij në Tiranë, teksa shtoi se nëse nuk do merrte pjesë, do të kishte një dëm të madh për vendin, shkruan Euronews Serbia.
Baton Haxhiu shprehet se të gjitha deklaratat e tij ishin lojëra.
Ai shtoi se nuk guxon asnjë lider i një vendi të mungojë në një samit të këtij niveli.
“Mendoj që Vuçiç do vinte drejt Tiranës që në momentin kur është paralajmëruar samiti. Këto janë lojëra të Vuçiç. Një lider i një vend nuk guxon ta humbë një samit të këtij niveli. Nuk ishte befasi për mua, ai po përkëdhelte veten”, u shpreh ai.
