Deputetët e LVV-së në Komisionin për Buxhet në mbledhjen e fundit nuk miratuan Projektligjin për tërheqjen e mjeteve nga Trusti.
Pavarësisht kësaj, kjo nismë shkon në Kuvendin e Kosovës pa përkrahjen e Komisionit përkatës.
Ky Projektligj pritët të shkojë në Kuvend në seancën e parë të këtij viti.
Kështu ka njoftuar dje deputeti i PDK-së, Bekim Haxhiu.
Lëvizja Vetëvendosje edhe njëherë ka dalë me qëndrim se është kundër tërheqjes së Trustit.
E një mendim ndryshe e ka deputetja e Grupit Multietnik, Duda Balje.
Ajo në një prononcim për Front Online thotë se do të votoj pro Trustit.
Balje ka treguar se në grupin e saj gjysma e deputetëve janë pro Trustit, e gjysma tjetër kundër.
“Unë do të votoj për Trustin, sepse jam duke e kuptuar gjendjen financiare dhe unë jam bashkë me qytetarët e di që është një vendim kundër Qeverisë por për këtë Projektligj unë do të votoj pro. Në grupin tonë parlamentar gjysma janë pro dhe gjysma kundër”, tha Balje.
Ndryshe, edhe kryeministri i Kosovës, Albin Kurti, është deklaruar disa herë kundër kësaj nisme, duke thënë se paratë e Trustit janë për qytetarët kur të dalin në pension, e jo që t’i shfrytëzojnë ato mjete tash.
