E shkruar natën e 24 marsit të vitit ’99, kur Kosova ngrysej Azi dhe zbardhej Evropë.
Terrori në Prishtinë
Shqiptarët u ngujuan sërish në shtëpi
serbët sërish nxorën tanket mbi asfalt
me gjak kremtojnë humbjet e tyre
sonte nata është gjashtë shekuj e gjatë.
Fusha e Mëllenjave është afër këtu
nga Prishtina veç gjashtë milje larg
gjashtëqint vjet më parë në fushën e saj
shqiptarë e serbë u mbytën në gjak.
As shpata e heshta sonte nuk oshëtijnë
nuk hingëllojnë as të zezët hamshorë
sonte është nata e avionëve supersonikë
dhe nesër Prishtina rrëzëllen Evropë.
Mëllenjat sonte janë shtrirë në fushë
me krahët e plagosur nuk fluturojnë lart
nuk ka cicërima, veç trishtim ka
ka erë lirie që vjen nga udhë e gjatë.
Askush nuk del sonte nga Prishtina
as të hyjë brenda s’mundet assesi
Tanket e hekurta sonte i tundon
Vetëm rrëzëllimi i apotheozës liri.
Prishtinë, 24 mars ‘99
