Presidentja e Kosovës, Vjosa Osmani, nëpërmjet një letre drejtuar Përfaqësuesit të Lartë të BE-së për Politikë të Jashtme dhe Siguri, Josep Borrell, e ka njoftuar atë për vazhdimin e mandatit të EULEX-it edhe për një vit.
Në letrën drejtuar Borell, Presidentja Osmani ka njoftuar se EULEX-i do të jetë me mandat teknik, pa fuqi ekzekutive dhe i bazuar vetëm në monitorim, mentorim dhe këshillëdhënie.
Avokati Artan Qerkini thotë se në bazë të kësaj letre EULEX-it nuk do t’i kthehen më kompetencat ekzekutive, por sipas tij puna e Gjykatës Speciale e ndryshon këtë situatë.
“Pra EULEX-i do të ketë kompetence ekzekutive sa i përket mandatit të Gjykatës Speciale, ndërsa në sektorët tjerë të drejtësisë nuk do të ketë kompetenca ekzekutive”, deklaroi Qerkini.
Avokati thotë se vazhdimi i mandatit të EULEX-it për një vit ndoshta mund të lidhet direkt me punën e Gjykatës Speciale.
Qerkini thotë se Kuvendi i Kosovës do të duhej të krijonte një komision hetimorë për të hetuar shkeljet e mundshme që mund të ketë bërë misioni i EULEX-it në rastet që ka trajtuar.
