Botapress 27 Prill – Ambasada amerikane në Kosovë do t’iu bashkëngjitet iniciativës së ndaljes së dritave nga ora tetë e mbrëmjes së të martës, në shenjë të të pagjeturve nga lufta në Kosovë. Kjo po shënohet në Ditën Kombëtare të Personave të Pagjetur.
Një gjë e tillë është bërë e ditur nga vetë ambasada, nëpërmjet një postimi në llogarinë e tyre në ‘Twitter’.
“Në ora 8:00 pasdite, do t’i bashkohemi qindra kosovarëve duke fikur dritat për 5 minuta. Ky është një formë demonstrimi i solidaritetit tonë me familjet që 20 vjet më vonë ende nuk kanë përgjigje dhe meritojnë të dijnë për fatin e të dashurve të tyre”, thuhet në postimin e ambasadës.
Iniciativa, e krijuar përmes një eventi në ‘Facebook’ nga Nisma Rinore për të Drejtat e Njeriut dhe organizata të tjera, ka marrë mbështetjen e më se 600 personave.
“Për të shënuar Ditën Kombëtare të Personave të Pagjetur, më 27 prill në ora 20:00, ftojmë të gjithë qytetarë/et e Kosovës t’i ndalin dritat nëpër shtëpitë apo banesat e tyre për 5 minuta”, thuhet në përshkrimin e eventit.
“Duke kaluar 5 minuta në errësirë do të mund të bashkëndjejmë sado pak me dhimbjen dhe terrin në të cilin ndodhen familjarët e 1,639 personave të pagjetur tash e 21 vite. Ndalja e dritave, tashmë është shndërruar në aksion tradicional, me anë të së cilit çdo vit, në të njejtën ditë, në të njejtën kohë, bashkë do të kemi mundësi ti kujtojmë personat e pagjetur”, shkruhet ndër të tjera.
