Prokuroria Speciale e Kosovës ka bërë të ditur se pas një hetimi disa mujor është zhvilluar një operacion nga Drejtoria Kundër Terrorizmit që ka rezultuar me pesë persona të arrestuar.
Arrestimi i personave të dyshuar ka ndodhur të dielën derisa në banesat e tyre, janë gjetur eksploziv, armë zjarri, dron, si dhe armë antitank. E lidhur me këto arrestime dhe rrezikun që i vihet Kosovës nga sulmet terroriste, ka folur njohësi i çështjeve të sigurisë, Nuredin Ibishi.
Ai tha se Kosova nuk është e përjashtuar nga sulmet e tilla, duke e pasur parasysh se një numër i madh i shqiptarëve të Kosovës kanë marrë pjesë në organizatat terroriste në Irak e Siri. Ibishi tha se duke veprimtaria e grupeve terroriste është ngushtuar në disa shtete e kjo paraqet rrezik të vazhdueshëm për Kosovën.
I pyetur si mund ta parandalojnë institucionet e vendit një sulm terrorist, Ibishi tha se një gjë e tillë është e pamundur pa ndihem e shteteve të cilat kanë marrë pjesë në operacionet luftarake anti-terroriste.
“Kjo është çështje komplekse, pa bashkëpunim ndërkombëtar SHBA-së dhe Bashkimit Evropian koalicionin qe ka qenë një kohë aktiv kundër terrorizmit për forcat Siri, Irak dhe pa këmbimin e informacionit kjo asesi nuk mund të bëhet vetëm nga burimet e brendshme çoftë të inteligjencës apo të policisë së Kosovës, apo njësisë anti-terroriste. Kjo është një çështje komplekse që shkon në këmbim të informacionit edhe më të vogël përveç sigurisë” deklaroi ai.
Ibishi foli edhe për qëllimin që kanë grupet terroriste në botë.Ai tha se qëllimi i tyre është destabilizimi për të treguar se ende janë prezent e tani duke u shtrirë edhe në Evropë.
“Qëllimi i tyre është të vazhdojnë me aktivitete edhe në Evropë. Qëllimi i tyre është që ta mbajnë në vazhdimësi aksionin me qëllim që të tregojnë se ende janë aktive dhe do të vazhdojnë luftën e tyre siç e kanë programin e tyre me organizatat terroriste. Pra me këtë të tregojnë se përkundër asaj që kanë pësuar humbje të terreneve në Siri e Irak dhe tash së fundi me aksionet e shpërndara në lindjen e mesme Afganistan e Afrikë tash së fundi përgatitjen e aksioneve në Ballkan tregojnë së ende janë ato që do të shpërndajnë dhunën”, tha ai.
