Prokuroria Themelore në Pejë ka dhënë detaje para mediave për aksionin e gjerë të Policisë së Kosovës që u zhvillua sot në regjionin e Pejës, ku u arrestuan 17 persona.
Prokuroria ka bërë të ditur se pas arrestimit të të dyshuarve, është lëshuar edhe një urdhër për ngrirjen e pasurive të personave që u arrestuan në aksionin e policisë, percjell Botapress.info
Para mediave ka folur edhe majori Kadri Kadriu nga Drejtoria e Hetimit të Krimit të Organizuar, i cili ka bërë të ditur se aksioni është zhvilluar në 21 lokacione, ku 17 prej tyre kanë qenë shtëpi banimi/banesa, ndërsa katër lokacione kanë qenë lokale biznesi.
Në konferencën për media është bërë e ditur se pasuritë e ngrira kalojnë shumën prej 5 milionë eurove.
Major Kadriu ka bërë të ditur para mediave gjithashtu se janë ngrirë edhe 104 parcela tokë, ku 21 prej tyre janë toka ndërtimore, ndërsa pjesa tjetër e tokave është bujqësore./Botapress.info/