Kryetari i LDK-së, Lumir Abdixhiku, ka folur në Kuvend për marrëveshjen e arritur në Ohër, duke thënë se kryeministri Kurti ka zhbërë të gjitha kushtet që i vendosi për themelimin e Asociacionit.
Ai tha se termi vetëmenaxhim është më i gjerë se asociacioni dhe se të drejtën vetëmenaxhuese të serbëve në Kosovë, Kurti e ka bërë kriter ndërkombëtar për Kosovën.
Kurti lë të kuptohet se Kosova do ta bëjë Asociacionin: S’do të ketë kompetenca ekzekutive
“Sado eksponentë të pushtetit po mundohen të ofrojnë vetëmenaxhimin si zëvendësim të asociacionit për të thënë se kanë ofruar diçka më mirë, prapë si lojë e brendshme politike në Kosovë, e vërteta e vetme është që vetëmenaxhimi është koncept shumë më i gjerë sesa asociacioni. Sepse vetëmenaxhimi është e drejtë, asociacioni është trup. E drejta e pranuar për serbët si vetëmenaxhim nuk është paralele me trupin organizativ ku ajo ankorohet. Mund të vendoset në asociacion, në këshill, në trup vetorganizativ. Por, ajo mbetet e drejtë. E drejta u është pranuar dhe jo vetëm aq. Kjo është bërë kriter ndërkombëtar nga BE për Kosovën për aq sa ka BE”.
Abdixhiku tha se tashmë Kosova duhet të adaptohet për të respektuar këtë marrëveshje meqë s’ka rrugë tjetër, derisa tha se Serbisë i është hapur rruga për anëtarësim në BE pa njohje.
“Rruga e vetme fatkeqësisht është që të adaptojmë veten për të përmbushur këtë kriter. Kjo është barra e përjetshme që Albin Kurti ia ka vënë gjeneratave. S’ka më rëndësi fati i tij politik. Një të drejtë vetëmenaxhuese një komuniteti serb kudo që jeton në Kosovë e ka vendosur kriter ndërkombëtar për anëtarësim në BE për Kosovën. Mbi çdo marrëveshje, mbi çdo ligj, mbi çdo kushtetutë”.
Abdixhiku e quajti “fat të trishtueshëm politik” të Kurtit, për siç tha ai, ndryshimet e qëndrimeve.
“Për këto qëndrime për pozicionin ndryshues të Albin Kurtit ndiej keqardhje. Çfarë shikimi do të kishte për vetën Albin Kurti në pasqyrë? Por, unë s’e kam brengë a i del vetja luan apo kameleon”.
