Avionët Fighter ndoqën objekte misterioze të ndritshme, disa prej tyre 30 metra të gjera dhe që udhëtonin me 11.500 mph (18507 km/h).
Pesë pilotë dëshmuan se panë 21 objekte të shfaqeshin dhe të zhdukeshin, ndërkohë që trupa në terren i panë gjithashtu ato.
Shefat e forcave ajrore pranuan se kjo “nuk ka asnjë shpjegim.”
Ajo që ndodhi do të jetë pjesë e një seance dëgjimore që do të zhvillohet në Senatin brazilian për UFO-t këtë javë.
Ngjarja vjen pasi Kongresi mbajti një seancë dëgjimore ndaj pamjeve të marra nga avionët luftarakë të marinës amerikane që tregonin objekte misterioze, të pashpjegueshme që hidheshin në qiell.
Por historia e asaj që u shpalos një natë në Brazil, një dekadë përpara se të bëheshin ato video, është po aq magjepsëse.
Për disa orë, qindra dëshmitarë, përfshirë elitën e ushtrisë së vendit, panë objekte të çuditshme që dukej se lëviznin me një shpejtësi të tmerrshme.
Pilotët panë objekte të çuditshme që nuk dukeshin në radarët e avionëve të tyre ndërsa objektet luanin “macja dhe miu” me ta.
Shenjat e para të objekteve të pazakonta u raportuan nga kontrollori i trafikut ajror të forcave ajrore braziliane, rreshteri Sergio Mota da Silva, në mbrëmjen e 19 majit 1986.
Ai vuri re një dritë në qiell nga kulla e kontrollit të një aeroporti pranë qytetit të Sao Paulos.
“Nuk shkon as lart as poshtë, nuk shkon majtas apo djathtas, thjesht qëndron aty”, tha ai.
Mota pyeti kontrollorët në aeroportin ndërkombëtar të Sao Paolos nëse ndonjë aeroplan po kalonte në fushën e tij ajrore, për të cilën ata u përgjigjën se nuk kishte.
Në një moment ai tha se i zbeu dritat në pistën e aeroportit, duke i bërë objektet të vijnë drejt kullës së kontrollit dhe më pas, kur rriti ndriçimin, ato u larguan.
“Nëse ata po përpiqeshin të ndërveprojnë me mua, nuk e di. Ajo që di është se ata u sollën me inteligjencë,” i tha ai BBC-së.
Rreth orës 20:00 rreth 2000 kadetë dhe oficerë nga një shkollë trajnimi të forcave ajrore në të njëjtën zonë, raportuan se panë dritat, shkruan The Sun.
Dritat në qiell u panë edhe nga dy avionë pasagjerësh, duke përfshirë një që udhëtonte në brendësi të Brazilit.
Forcat ajrore më pas u hodhën në aksion për të kapur objektet – por kjo nuk ishte një detyrë e thjeshtë pasi pilotët e gjetën veten të çorientuar nga ajo që po ndodhte.
