.
×

Sekretari i SHBA-së ka një porosit për Prishtinën e Beogradin



Beogradi e Prishtina duhet të kthehen në tavolinën e bisedimeve para zgjedhjeve në Serbi, të paralajmëruara për pranverën e vitit të ardhshëm, ka thënë zëvendësi i ndihmësit të sekretarit të shtetit të ShBA-ve Matthew Palmer.

“Zgjedhjet në Serbi janë sigurisht në pranverën e ardhshme dhe është me rëndësi që bisedimet të vazhdojnë më parë, pasi që cikli zgjedhor i vështirëson ato”, ka thënë Palmer për programin e BBC-së në gjuhën serbe.

Ai ka thënë se Kosova duhet t’i heqë taksat e vëna në mallin serb e të BeH-së dhe të vazhdojë dialogu.

Palmer ka thënë se formati i bisedimeve sigurisht se nuk do të ndryshojë dhe se Uashingtoni në asnjë mënyrë nuk ka ndikuar në shtyerjen e takimit në Paris, duke thënë se “Amerika e mbështet këtë proces, ne nuk jemi pjesë e bisedimeve, por e mbështesim dialogun të cilit i prinë BE-ja që nga fillimi”.

Zyrtari i Departamentit të Shtetit mendon se as zgjedhjet presidenciale në ShBA vitin e ardhshëm nuk do të ndikojnë shumë në tempin e bisedimeve për Kosovën.

“Nuk pres që zgjedhjet në Amerikë do të ndikojnë në mbështetjen për normalizimin e marrëdhënieve të Beogradit e Prishtinës – kjo është konstantë gjatë më shumë administratave në Uashington”, ka thënë ai.

Palmer ka mohuar shkrimet e gazetave se Philip Reeker mund të përfshihet në dialog.