.
×

Presioni i Amerikës zhbllokon KQZ-në



Presidenti Thaçi pas një “urdhri” që mori dje nga Ambasada Amerikane, nesër do ta bëjë emërimin e anëtarëve të rinj të Komisionit Qendror të Zgjedhjeve. Pikërisht në përvjetorin e parë të bllokadës së KQZ-së Thaçi do t’ia hapë funksionimin këtij organi.

Komisioni Qendror i Zgjedhjeve nesër do të nisë së funksionuari. Saktësisht pas një viti bllokadë presidenti i Kosovës, Hashim Thaçi, ka vendosur që nesër të bëjë dekretimin e anëtarëve të rinj të këtij organi dhe ta funksionalizojë punën e KQZ-së.

“Zyra e Presidentit të Republikës së Kosovës njofton se pas përmbylljes së të gjitha procedurave dhe kompletimit të lëndëve me informacionet e kërkuara shtesë këtë javë do të emërohen anëtarët e rinj të KQZ-së. Anëtarët e rinj të KQZ-së, të enjten, më 28 mars 2019, do ta bëjnë betimin para presidentit Thaçi”, thuhet në njoftimin e Zyrës së Presidentit, shkruan më tutje “Zëri”.

Kjo deklaratë e Zyrës së Presidentit erdhi pak kohë pasi Ambasada e Shteteve të Bashkuara të Amerikës kërkoi nga Hashim Thaçi që menjëherë t’i emërojë përfaqësuesit e partive politike në KQZ, në mënyrë që ky institucion t’i kthehet punës normale.