.
×

Paralajmërohen masa për taksistët ilegalë dhe shfrytëzuesit e hapësirave publike pa leje



Drejtori i Inspekcionit në Komunën e Prishtinës, Adonis Tahiri ka thënë se janë duke punuar që ndërtimet pa leje në Prishtinë të pezullohen. Ai ka potencuar që edhe shfrytëzimi i hapësirave publike pa leje do të gjobitet.

”Ka angazhim më shumë në terren më shumë telashe më shumë sfida. Pavarësisht të numrit të vogël që janë në fushën e ndërtimit, kemi arritur që gjatë këtyre dy mandateve t’i ndalojmë ndërtimet e egra”, ka thënë Tahiri.

”Të gjitha këto vërehen nga inspektorët dhe merren masat e caktuara të ndëshkimit të parapara me ligj”.

”Në lidhje me çështjen e ndërtimit të rrethojave të vend punishteve kemi nisur edhe gjoba. Disa gjoba në ditë, nuk kam shifër të saktë por është një numër i konsiderueshëm i tyre”.

Ai ka shtuar se ka shumë ndërtime pa leje por ky proces po pezullohet, ndërkaq thotë se ideja e procesit të legalizimit është që një pjesë e madhe e këtyre ndërtimeve të legalizohen.

Tahiri po ashtu paralajmëroi masa edhe për taksitë ilegalë pasi kanë hasur në ngasës të cilët posedojnë kontrata pune në institucione.

”Nuk mund të vazhdohet kështu siç ka qenë deri tash. Ne jemi të përkushtuar që të lirojmë hapësirë në trafik për qytetarët e Prishtinës e sidomos për trafikun urban. Këtë aksion nuk do ta ndalim derisa kjo dukuri të zhduket në tërësi. Kemi shkuar me paralajmërim për ta por ka qenë e kot”, thotë Tahiri.

Ndërkaq ai thekson se Komuna e Prishtinës një herë në vit lëshon leje për taksitë dhe secili prej tyre mund të aplikojë.

”Ne e kuptojmë që disa prej tyre kanë gjendje të rëndë financiare por ka edhe prej tyre që kanë kontratë pune, dhe ka prej tyre që punojnë edhe nëpër institucione. Nuk janë të gjithë me probleme financiare”, ka thënë Tahiri.

Ai po ashtu thotë se nuk mund të lejohet që sheshi të shndërrohet në treg dhe se do të ketë zero tolerancë për ata që tentojnë të shfrytëzohet hapësira pa leje.