.
×

Nuk mbahet seanca në gjykimin e komandantit dhe zv.komandantit të Policisë



 

Në Gjykatën e Mitrovicës sot ka dështuar të mbahet seanca e shqyrtimit fillestar në rastin e zyrtarëve policorë Bratisllav Kragoviq dhe Darko Gusniq.

Kragoviq e Gusniq akuzohen për kryerjen e veprës penale – keqpërdorim i pozitës apo autoritetit zyrtar.

Prokuroria Themelore e Mitrovicës akuzon Bratislav Kragoviqin se në cilësinë e komandantit dhe Darko Gusniqin si zëvendëskomandant në stacionin policor në veri të Mitrovicës, nuk i kanë verifikuar shpenzimet e derivateve të naftës për automjetet zyrtare të Policisë së Kosovës, me ç‘rast i kanë shkaktuar dëm buxhetit të Republikës së Kosovës në shumë prej 9.146.01 euro.

I pranishëm në seancë ka qenë i akuzuari Bratisllav Kragoviq por nuk ka prezantuar i akuzuari Darko Gusniq.

Gjithashtu në seancë ka munguar edhe prokurori i rastit Ismet Ujkani.

Lidhur me mungesën e prokurorit Ujkani gjyqtari i rastit Radosllav Markoviq nuk ka dhënë ndonjë sqarim, ndërsa për të akuzuarin Gusniq ka thënë se nuk ka prova se ai e ka pranuar ftesën për këtë seancë.

Më këtë sipas gjyqtari nuk ishin plotësuar kushtet për mbajtjen e seancës.

Ndryshe sipas aktakuzës së Prokurorisë Themelore në Mitrovicë, Bratisllav Kragoviq dhe Darko Gusniq, po akuzohen se në periudhën kohore nga data 1 janar 2011 deri në muajin prill të vitit 2012, si persona zyrtarë në stacionin policor në veri të Mitrovicës, kanë keqpërdorur pozitën e tyre zyrtare.

Bazuar në aktakuzë, i akuzuari Bratislav Kragoviq si komandant dhe Darko Gusniq si zëvendëskomandant, nuk i kanë verifikuar shpenzimet e derivateve për automjete zyrtare të Policisë, të mbushura me derivate nga zyrtari i stafit civil, Dragan Kompiroviq.

Në vazhdim të aktakuzës, thuhet se të akuzuarit Bratisllav Kragoviq dhe Darko Gusniq, kanë nënshkruar memorandumet për shpenzimet e derivateve për automjetet zyrtare të Policisë, me ç‘rast i është shkaktuar dëm buxhetit të Republikës së Kosovës në shumën prej 9.146.01 euro.

Me këtë, akuzohen se kanë kryer veprën penale “keqpërdorim i pozitës apo autoritetit zyrtar” nga neni 422 paragrafi 1 lidhur me nenin 31 të Kodit Penal të Republikës së Kosovës.

Kurse seanca e radhës u caktua më 29 gusht 2018. /kallxo.com