[responsive-menu menu="logged-in-menu"]

Jahjaga takon Grupin punues për qasje në drejtësi për viktimat e dhunës seksuale gjatë luftës



Botapress,2 Nëntor

Presidentja e Republikës së Kosovës, Atifete Jahjaga ka pritur sot në takim anëtarët e Grupit punues për qasje në drejtësi për viktimat e dhunës seksuale gjatë luftës, kryesuesin e Këshillit Gjyqësor të Kosovës, Enver Peci, zëvendëskryeprokuroren e Shtetit, Sevdije Morina, zëvendësministrin e Drejtësisë, Lirak Çelaj dhe përfaqësuesen e EULEX-it, kryeprokuroren Jaroslava Novotna

Siç bëhet e ditur në një njoftim të Presidencës, Jahjaga i përgëzoi përfaqësuesit e institucioneve të drejtësisë për finalizimin e planit të veprimit për qasjen në drejtësi për viktimat e dhunës seksuale gjatë luftës, duke e cilësuar atë si një nismë të rëndësishme të institucioneve të vendit për ofrimin e drejtësisë për viktimat e dhunës seksuale gjatë luftës.

“Presidentja Jahjaga tha se qasja në drejtësi është një ndër prioritetet kryesore të Këshillit Kombëtar për të Mbijetuarit e Dhunës Seksuale gjatë Luftës, me qëllim të rehabilitimit të këtyre viktimave dhe theksoi nevojën e ofrimit të mekanizmave ligjorë institucionalë në përputhje me specifikat e këtij krimi të luftës”, thuhet në njoftim.

Më tej shtohet se zëvendësministri i Drejtësisë, Lirak Çelaj tha se për implementimin e këtij plani duhet të bëhen reformat e nevojshme në institucionet e drejtësisë, me qëllim të zhvillimit të kapaciteteve të akterëve relevantë, si dhe ofrimin e mbështetjes për të garantuar fuqizimin e viktimave të dhunës seksuale dhe ngritjen e vetëdijes shoqërore për këtë krim lufte.

Ndërkaq, po sipas njoftimit, kryesuesi i Këshillit Gjyqësor të Kosovës, Enver Peci njoftoi Presidenten Jahjaga me vendimin e këtij institucioni për përzgjedhjen e tre gjyqtarëve nga Gjykata Themelore në Prishtinë dhe nga një gjyqtar në gjykatat rajonale themelore të Kosovës, për të marrë përgatitjen e nevojshme profesionale për trajtimin e çështjeve që kanë të bëjnë me dhunën seksuale gjatë luftës si dhe me dhunën në familje.

“Përkushtimin e tyre për t’iu mundësuar qasje në drejtësi viktimave të dhunës seksuale gjatë luftës e shprehën edhe zëvendëskryeprokurorja e shtetit, zonja Sevdije Morina, si dhe përfaqësuesja e EULEX-it, zonja Jaroslava Novotna”, shtohet më tej në njoftim.

Grupi punues për qasje në drejtësi për viktimat e dhunës seksuale gjatë luftës është formuar me kërkesë të Presidentes Jahjaga, si pjesë e angazhimeve në kuadër të Këshillit Kombëtar për të Mbijetuarit e Dhunës Seksuale gjatë Luftës.

Për më shumë lajme, bëjeni Like duke klikuar këtu

Menu Title