.
×

Intervistë|| Sali Asllanaj: Urgjentisht të formohet Qeveria, LDK të gjejë zgjidhjen për Shtetin



Nëse do të kishte vullnet për pesë minuta do të gjendej zgjidhja e bllokadës politike. Por, mungon vullneti i liderëve të cilët e kanë harruar interesin e shtetit dhe të qytetarëve. Pavarësisht kësaj, LDK duhet të gjejë një zgjidhje për të mirën e shtetit. Kjo situatë nuk duhet të vazhdojë më sepse më mirë është të kemi një qeveri të keqe se sa vendi të funksionojë pa qeveri. Kryetari i Degës së LDK’së dhe i Komunës së Therandës, Sali Asllanaj, flet për Express.

Sipas jush, cila duhet të jetë zgjidhja e kësaj bllokade politike, ku PDK dhe Blloku nuk po lëshojnë pe sa i përket Kryeparlamentarit?

S. Asallanaj: Së pari, dua ta shpreh shqetësimin tim dhe të shumë qytetarëve të Kosovës, se me zhvillimet në qendër jam shumë i pakënaqur pa dashur t’i fajësoj veç e veç asnjërin subjekt politik. Por, secili e di se ka nevojë për me u marrë vesh. Realisht, këto probleme zgjidhen për pesë minuta, por deri më tash është duke munguar vullneti i të gjitha palëve për një marrëveshje. Pra, mbi të gjitha duhet të jetë marrëveshja për të dalë nga kjo situatë.

 Cili duhet të jetë roli i LDK’së në krejt këtë situatë?

S. Asallanaj: Zgjidhja gjithmonë duhet të gjendet në bazë të fuqisë politike të secilës parti sipas rezultatit zgjedhor. Kjo i bie qe në asnjë mënyrë të mos lëshohet pe për pozicionet ose për pozitat e pushtetit që eventualisht të takojnë. Parimisht, po flas pa hyrë në detaje.

Disa zyrtarë të LDK’së kanë kërkuar rishqyrtimin e marrëveshjes LDK-AAK-NISMA dhe që Isa Mustafa të bëhet Kryeministër. Si e shihni një mundësi të tillë?

S. Asallanaj: Gjithmonë, rishqyrtimet e marrëveshjeve janë me dhimbje shumë. Sepse rishikimi i marrëveshjes nënkupton që duhet të pajtohet edhe pala tjetër. Pra, rishikimi i marrëveshjes është çështje e ndjeshme, por i mbetet Kryesisë së LDK’së dhe Kryetarit Mustafa të gjejnë një zgjidhje në favor të Kosovës. LDK është veçuar me konceptin institucionalist që gjithmonë ka lëshuar pe dhe është sakrifikuar për të mirën e Shtetit.

 Mirëpo, deri më tash Blloku e ka dëshmuar se më të rëndësishme e ka pozitën e Kryeparlamentarit se sa largimin e shpejtë të Thaçit nga pushteti?

S. Asallanaj: Ky Blloku nuk e ka të sigurt se eventualisht se pas votimit të Kryetrarit të Kuvendit do t’i lejohet të formojë Qeverinë. Në asnjë mënyrë nuk është shprehur një gatishmëri prej PDK’së që do të ndodhë një gjë e tillë. Përkundrazi, PDK po pretendon se mandati i parë dhe i dytë për formimin e Qeverisë iu takon atyre. Kjo lë të kuptohet se ose “ne ose në zgjedhje”. Do të duhej të lëshonin pe secili dhe të shohim se ku është problemi.

 Cila është ideja juaj – një Qeveri gjithëpërfshirëse, teknike apo…?

S. Asallanaj: Një Qeveri me marrëveshje ku kushtimisht po them se edhe formimi i Qeverisë më të keqe është më mirë se sa jemi aktualisht. Një Qeveri patjetër, një qeveri, e cila përfaqëson interesat e qytetarëve të Kosovës e jo interesat personale të liderëve të partive.

 Rrjedhimisht, sipas jush, të gjithë liderët pa përjashtim po i këqyrin interesat personale dhe e kanë harruar interesin e qytetarëve?

S. Asallanaj: Absolutisht, ky konstatim qëndron dhe është i vërtetë.Express