.
×

Haradinaj: Në përvjetor të masakrave na rikthehen pamjet e luftës



 

Kryeministri i Kosovës, Ramush Haradinaj ka përkujtuar dëshmorët, në prag të masakrës së Krushës së Vogël, Krushës së Madhe, Kotlinës, Suharekës, Lybeniqit, Izbicës, Mejës, Pastaselit dhe Leshanit.

Haradinaj ka kujtuar edhe familjet Berisha e Bogujevci, duke thënë se në prag të përvjetorit, pamjet e luftës rikthehen sërish.

Publikimi i plotë i Haradinajt:

Në përvjetorin e masakrave të Krushës së Madhe, Krushës së Vogël, Kotlinës, Suharekës, Lybeniqit, Izbicës, Mejës, Pastaselit, Leshanit, flijimit të familjes Berisha në Suharekë, familjes Bogujevci në Podujevë dhe të gjitha krimet tjera, pamjet e luftës së fundit në Kosovë na rikthehen sërish.

Sot kujtojmë aktin çnjerëzor mbi një popullatë të tërë ë pafajshme. Fëmijë, pleq, gra e burra, të pambrojtur, u bënë cak i terrorit të regjimit serb. Ndër breza do të kujtohen të gjithë martirët, nga gjaku i të cilëve u vendosen themelet e Kosovës së lirë.

Kujtojmë sot betejën e Landovicës dhe tetë dëshmorët e rënë!

Në ditën e sotme, më 2001 ra dëshmor Njazi Azemi, luftëtar i orëve të para të UÇK-së dhe UÇPMB-së dhe më këtë rast, e nderojmë Komandant Mjekrrën, qoftë i ndritur emri dhe vepra e tij.

Lavdi e nder i përjetshëm të gjithë martirëve dhe dëshmorëve!