.
×

‘Dorëzohet’ Vuçiq: Jam i gatshëm të bëjë lëshime për Kosovën



 

Botapress, 16 maj-

Presidenti i Serbisë, Aleksandar Vuçiq ka folur sot për të ardhmen e vendit të tij dhe lidhjen e pashmangshme me Kosovën në këtë rrugë.

Në një intervistë për EuroNews, Vuçiq i pyetur se kur do të mund të anëtarësohet Serbia në Bashkimin Evropian, pas parasysh se bazuar në buxhetin e propozuar nga Komisioni Evropian nuk ka shenja se ndonjë vend do të mund të anëtarësohet në bllok para vitit 2027, Vuçiq thotë se askush s’ka garantuar se vendi i tij do të jetë pjesë e BE-së në vitin 2025.

“Ata kanë thënë: Nëse i kryeni punët… Punët kanë të bëjnë kryesisht me marrëveshjen me Kosovën. ‘Nëse i zgjidhni të gjitha problemet me Prishtinën’ dhe më pas gjithçka tjetër, përfshirë sundimi e ligjit dhe gjithçka që kërkojmë nga ju, atëherë do të mund të bëheshim anëtar i BE-së më 2025. Dhe jemi në rrugën e BE-së që nga viti 2000. Kanë kaluar 18 vjet dhe për këtë arsye njerëzit ndihen, herë pas here, të lodhur. Por, sidoqoftë, nuk ka zgjidhje më të mirë. Ne do ta kryejmë punën tonë. Do të investojmë përpjekje të mëdha në tentim për të gjetur një zgjidhje për Kosovën”, ka thënë Vuçiq, shkruan Beta, transmeton lajmi.net.

Gazetari i EuroNews ia përmend Vuçiqit ndalimin e karateistëve kosovarë që të marrin pjesë në kampionatin Evropian që u mbajt në Novi Sad, duke e pyetur se si do të duket normalizimi i marrëdhënieve me Kosovë kur shteti serb e bëri atë ndalesë.

“Ne vepruam në mënyrën shumë të duhur. Ua lejuam atyre hyrjen, por pa flamur shtetëror të Kosovës. Sepse për neve ata nuk janë shtet. Por jo vetëm për ne. Por për të gjithë të tjerët. Dhe ne u pajtuam që të vijnë pa flamuj shtetërorë dhe se nuk do të ketë as flamuj serbë, e as të shteteve tjera pjesëmarrëse. Kjo mund të bëhet, pa himn shtetëror e pa asgjë tjetër. Ata thanë; ‘Jo, jo, nuk e pranojmë këtë’ sepse deshën të ndaloheshin”, tha Vuçiq.

Gazetari i thotë se nga jashtë, veprimi i javës së kaluar me ekipin kosovar të karatesë është dukur i ngjashëm me provokimin e vitit të kaluar, kur Serbia nisi trenin ne Kosovës me një flamur të madh serb dhe me mbishkrimet “Kosova është Serbi” dhe se kjo mund të ketë qenë provokim i dyanshëm.

“Nuk ka provokime të dyanshme. Nëse na thoni neve se Kosova është shtet i pavarur, a është provokim i madh kundër Serbisë? Madje edhe vendi juaj, vendi prej nga vini, e ka njohur pavarësinë e Kosovës, a është ky një provokim i madh sot? A t’ju konsideroj juve si provokues të madh? Sepse ke një mendim ndryshe në lidhje me statusin ligjor të Kosovës në krahasim me ne? Ne e respektojmë faktin se mendojnë ndryshe nga ne, kur flasin për statusin ligjor të Kosovës. Dhe ky është dallimi. Dhe ende mendoni se ka qenë provokim se dikush e ka shkruar ‘Kosova ishte Serbi’. E pabesueshme. Unë mendoj se Kosova është Serbi. Apo ju provokoj? Apo çka? A do të me arrestoni? Do të me vrisni? Apo çka? Nëse ky është provokim i madh. Dhe në të njëjtën kohë, jam shumë i gatshëm të flas për kompromise dhe të bëjë koncesione sa më shumë që të jetë e mundshme. Por jo të poshtëroj popullin dhe të mos i rrezikoj interesat e Serbisë”, tha presidenti serb.

Vuçiq, Thaçi dhe përfaqësues të tjerë të Ballkanit Perëndimor do të takohen nesër në Sofje në samitin e madh BE-Ballkani Perëndimor.