.
×

Bahtiri iu bën ftesë krerëve të institucioneve dhe liderëve politikë në Mitrovicë për të kundërshtuar tendencat për ndarjen e Kosovës



Duke parë se disa zhvillime të kohëve të fundit lidhur me situatën në vend në përgjithësi, po shkojnë në drejtim të kundërt me interesat kombëtare dhe shtetërore të Kosovës, kryetari i Komunës, Agim Bahtiri ka caktuar për të hënën, (23 korrik) një takim, në të cilin do të bisedohet për këto zhvillime dhe për aktivitetet e nevojshme për të kundërshtuar ato.

“Deklaratat e liderëve të vendit se në bisedimet me Serbinë nuk do të ketë vija të kuqe, janë paralajmërime ogurzi për të ardhmen e Kosovës, që nënkuptojnë edhe mundësinë e ndarjes së Kosovës. Meqë situata është tepërserioze, ajo kërkon mobilizimin e të gjithë qytetarëve dhe institucioneve të vendit për të kundërshtuar fuqishëm tendencat e këtilla, që janë aspirata të kamotshme të Serbisë”, thotë kryetari Bahtiri.

Prandaj, kryetari Bahtiri i fton përfaqësuesit e institucioneve, liderët e të gjitha partive politike në Mitrovicë, përfaqësuesit e komuniteteve fetare, të OJQ-ve e asociacioneve të ndryshme dhe personalitetet me autoritet e ndikim, që të marrin pjesë në këtë tryezë dhe të japin kontributin e tyre për parandalimin tendencave të tilla, të cilat janë në kundërshtim të plotë me interesat e shtetit të Kosovës dhe qytetarëve të tij.
Në këtë tryezë do që të bisedohet për hapat e mëtutjeshëm të kundërshtimit të idesë së ndarjes dhe mundësisë të arritjes së dakordimit për organizmin e një proteste gjithë-popullore gjatë ditëve të ardhshme. Tryeza do të mbahet në ambientet e Qendrës së Kulturës “Rexhep Mitrovica”, buzë Ibrit, duke filluar në ora 12:00/BP